喔唷哇啦吵煞了,
微信里厢哪能啦,
伊拉讲3号里林发进来了,
林发阿拉认得咯,
听听伊拉勒了讲点啥。
伊讲看了人人头啋都勿认得,
气的大家哇哇叫。
咯种事体有啥啦,
四十多年不碰头,
噻变老头老太啦。
顶顶生气是阿拉,
伊讲小辰光我手拨伊弄脱臼,
怪不得现在写字像蟹爬。
回头问问柏万青,
啊能叫朱家赔点啥?
伊讲四只白瓷杯,
阿爸姆妈拨伊咯,
结婚礼品珍藏到现在。
想来想去想勿落,
好么事为啥统统拨人家?
瑶媛阿妹插话讲:
阿哥到新疆,
朱家伯伯英雄金笔赠拨伊。
迭中好事体,
我哪能轮勿上咯啦。
还有洪家姆妈滑稽伐,
带仔伊搭子伊拉阿姐看电影,
啥体不带我去啦。
小辰光事体伊不讲,
阿拉哪能晓得啦?
大家刮我老面皮:
喔,混了几十年,
哪能介无赖。
春生阿姐讲得好:
墩仁里本是个和睦大家庭。
过去墩仁里
家家阿伯像绅士,
身板挺直频频点头打招呼,
户户姆妈忙家务,
里里外外服侍一家门;
过去墩仁里
阿哥阿姐做榜样,
学习上进助人为乐从不骂山门。
现在弄堂呒没了,
亲情永远留勒了心里厢。
我想回到墩仁里,
向老老少少作揖拜新年:
一拜长辈身体健,
二拜兄姐精神好,
发小对拜弄堂里厢白相相。
哎,猜咚哩猜好伐?
——“乒呤乓啷起”;
喂,官兵捉强盗白相伐?
——“野蛮小鬼盘盘好,
阎皇老爷出世喽”。
“喔唷哇啦”
“做啥啦?”
“老虫咬我呀”
“快点上来呀!”
记得伐?作为网歌阿好啊。
2015年2月16日
评论